Torna a Surriento

Ernesto De Curtis, Giambattista De Curtis

Vir ’o mare quant’è bello,
Ispira tantu sentimento,
Comme tu a chi tiene a’ mente,
Ca scetato ’o faie sunnà.

Guarda qua chistu ciardino;
Siente, sie’ sti sciure arance:
Nu profumo accussi fino
Dinto ’o core se ne va...

E tu dice: «I’ parto, addio!»
T’alluntane da stu core...
Da la terra de l’ammore...
Tiene ’o core ’e nun turnà?

Ma nun me lassà,
Nun darme stu turmiento!
Torna a Surriento,
famme campà!

Vir ’o mare de Surriento,
che tesoro tene nfunno:
chi ha girato tutto ’o munno
nun l’ha visto comm’a ccà.

Guarda attuorno sti Serene,
ca te guardano ’ncantate,
e te vonno tantu bene...
Te vulessero vasà.

E tu dice: «I’ parto, addio!»
T’alluntane da stu core
Da la terra de l’ammore
Tiene ’o core ’e nun turnà?

Ma nun me lassà,
Nun darme stu turmiento!
Torna a Surriento,
Famme campà!

1902